媒體報導：搜查線：榴槤放題有幾激？1 人鯨吞 6 個 / 東方日報

媒體報導：搜查線：榴槤放題有幾激？1 人鯨吞 6 個
東方日報 / 2016-08-01

香港人鐘意任食，不論是日式放題、酒店自助餐抑或任食火鍋都大受歡迎。近日，有「水果之王」之稱的榴槤都可以任食，而且不是加工產品，全部皆是實實淨淨原個新鮮榴槤。結果放題消息傳出，即時吸引不少榴槤忠實粉絲入場支持，令香港出現罕見的純榴槤任食場面，主辦單位更預計每人可進食6個。不過中醫師警告，任何放題都忌「博老命」，尤其是榴槤一直被中醫指是燥熱之選。

水果零售商榴槤BB與馬來西亞聯邦農業促銷局 (FAMA)合作，舉行榴槤放題。入場者可以任食5種榴槤，包括純種老樹（888）、紅肉（D101）、金包（D13）、蘇丹王（D24）及老樹貓山王（D197）。榴槤BB創辦人KK指，「今次用咗兩架貨機，由馬來西亞運咗2.8噸，即係1800個榴槤嚟香港，300個參加者，平均一人可以食6個。」馬來西亞榴槤出口商會會長拿督Paul Mak表示，「純種老樹第一次出口到香港，香港人之前無食過。」

榴槤放題罕見，迅速吸引不少榴槤忠實粉絲入場，300參加者分為5場，每場60人，在剛過去的周六開始第一場，現場所見參加者以女性為主。「覺得放題依個概念有創意，D24就最好味。」麥氏夫婦指，不怕食得太多榴槤會不適，因為平時不會食太多。麥小姐及衞小姐就指，「咁啱我哋兩個都好鐘意食，見到依個活動就即刻報名，今日食咗10幾件。」

榴槤粉絲可一次過任食5種不同榴槤，現場所見不少人都「博老命」，見他們一件接一件放入口，滋味無窮，每個人都閒閒哋進食10多件，有人甚至形容已食得「不計其數」。不過，中醫師關之義強調，「唔好人出食物，自己出命。可以食幾多榴槤無絕對標準，因人而異，身體較燥熱嘅食一件都多，身體較虛食多啲都無問題。」關提醒，進食榴槤時，不宜飲酒或與煎炸或辛辣食物一同進食。另外，榴槤容易令人產生熱氣症狀例如喉嚨痛，可以食山竹或者飲用淡鹽水紓緩症狀。

註冊營養師陳勁芝表示，榴槤的碳水化合物含量高，一件與雞蛋大少相若的榴槤，就有10克碳水化合物，等如半塊麵包。進食過量榴槤對身體會有影響，要控制血糖及體重的人士更需特別注意。「唔建議大家食榴槤放題，令身體面臨挑戰，淺嘗會比較好，不過偶爾一次問題不大。」雖然一次過可以食5種榴槤十分吸引，不過大家都要量力而為。

閱讀全文：
屏幕截圖
原文出處

更多
~ 媒體報導 ~