媒體報導：7 大馬來西亞榴槤放題　貓山王及 150 年樹齡金絲貓都有得食 / UNWIRE.HK

媒體報導：7 大馬來西亞榴槤放題　貓山王及 150 年樹齡金絲貓都有得食
UNWIRE.HK / 2016-09-19

榴槤的味道唔係人人受得起，不過一但愛上就可以都會好似上癮一樣聞到都流晒口水。上星期觀塘 The Wave 就傳出陣陣榴槤香，味道直逼觀塘地鐵站！八卦的依莉詩當然去探過究竟啦！

18 噸馬來西亞榴槤直送

原來榴槤香的源頭來自差不多 18 噸、即係 10000+ 個馬來西亞榴槤。每一個樹上熟的榴槤都係即日由馬來西亞空運到港，即開即食，夠晒新鮮。眼見職員手起刀落密密手準備一連 3 日，共 11 場的馬來西亞榴槤任食品鑑會，睇到都流晒口水。榴槤BB 負責人 KK 直言今次係「蝕住做」！唔係同馬來西亞境外官方合辦，都幾難做到 $450 任食。同場更有馬來西亞農業部屬下的「馬來西亞聯邦農業促銷局 (FAMA)」及幾位資深榴槤種植專家同榴槤愛好者分享榴槤的小趣事。

任食期間，馬來西亞榴槤出口商會會長拿督 Paul Mak 仲同我哋大玩遊戲，答啱問題仲有原果貓山王送添！真係又食又拎！

職員手起刀落，開完一個又一個榴槤，最快 15秒就開到一個，超快手啊！

每一個都即開即食，非常新鮮。

第一次見到咁多榴槤，每一件都相當金黃，忍唔住要食多幾舊呢！

平時食榴槤身邊總有人投以不友善的目光，今次一大班同好一齊食，終於可以放膽係咁食，所以全場氣氛都好好，每個人都好興奮呢！

7 種榴槤排住隊等大家試，當中排最尾的更係最矜貴的金絲貓啊！

7種榴槤由淡至濃品嚐

放題一開始每人都會分到一盤 7件的榴槤，當中包括純種老樹（888）、紅肉（D101）、金包（D13）、蘇丹王（D24）、老樹貓山王（D197）、50 年老樹名種及 150 年老樹金絲貓。味道同口感各有不同，試啱，就可以係頭 5 種榴槤再揀自己想食邊種，之後就會一盤盤咁送上。

1) 純種老樹（888）

純種老樹呈淡黃色，榴槤味較淡，而且偏甜。最啱榴槤初哥。

2) 紅肉（D101）

紅肉帶少許橙紅色，肉質細滑，有奶油口感，Creamy 到好似食雪糕，入口清甜帶少許回甘。

3) 金包（D13）

金包果肉顏色較深黃帶橙色，榴槤味比較突出，甜度較濃，係貓山王的表弟。

4) 老樹 XO（D24）

老樹 XO 又稱「蘇丹王」，現時市面的榴槤雪糕多數用呢個品種造成，甜度高之餘帶點酒香，肉質柔軟但較乾身。

5) 老樹貓山王（D197）

貓山王相信唔駛介紹都聽過，摘自 30 年或以上樹齡的老樹，金黃色果肉，肉厚核小，味道層次最豐富濃郁，入口即溶帶回甘，甚至帶苦味。

6) 名種

名種摘自 50 年或以上樹齡的老樹，非常珍貴。果肉呈奶色，肉質幼滑偏濃味。

7) 金絲貓

金絲貓摘自 150 年或以上樹齡的老樹，矜貴都連拿督都只食過兩次，味道層次豐富，有點似咖啡、亦有點似花生回甘味濃。單單只嚐一口已經值回票價。

一開始每人會有一個榴槤拼盤，由味道較淡的純種老樹開始食起，到味道較濃的貓山王，最後就係特別嘉賓名種同金絲貓。每食一種，最好飲啖水漱漱口，先可以試到每款榴槤的真味。

依莉詩：「一次過食咗十幾舊啊！」

平時食榴槤總係要就住就住，唔係怕俾人話臭就係怕食太多會爆瘡。今次一大班同好一齊食，終於可以放膽係咁食，所以全場氣氛都好好，每個人都好興奮呢！起初以為只係食榴槤會好齋，但原來 7種榴槤都有唔同口感，唔同味道，唔經唔覺自己就食咗十幾舊，現場仲有人食到 60 幾舊添！真係起誇張啊！負責人 KK 表示 12 月可能會再有同類活動，如果係各位愛榴槤的 wire 民記得留意啊！

閱讀全文：
屏幕截圖
原文出處

更多
~ 媒體報導 ~