媒體報導：一年四季都有得食重口味榴槤 Gelato Bar / OpenRice 開飯喇

媒體報導：一年四季都有得食重口味榴槤 Gelato Bar
OpenRice 開飯喇 / 2016-09-15

唔捨得畀個夏天完，除咗係因為唔捨得個暑假之外，仲有一班榴槤 Fans 係唔捨得畀榴槤個當造期完！不過咁，如果將果肉整成雪條又點睇？香港有公司就將貓山王榴槤肉整成 Gelato Bar，味道香濃到好似直接食緊榴槤肉咁！

榴槤 BB 專門從馬來西亞入口唔同品種嘅榴槤，等香港嘅榴槤 Fans 唔洗飛都食到香濃榴槤肉。雖然榴槤當造期啱啱完結，但 Fans 依然可以食呢個 Gelato Bar 一解相思之苦！

今次推出嘅係貓山王 Gelato Bar 嘅迷你版本，造型變成可愛榴槤BB之餘，Size 亦變細咗，一個人自私食完一條都絕對唔會覺得膩口。

Size 變細咗，但美味就 Upgrade 咗！新版本分開貓山王果肉同貓山王 Gelato 兩層，標榜 100% 真實果肉，一打開紙盒已經聞到榴槤嘅獨特香味。拆埋膠袋一睇，Gelato 顏色同果肉接近，可想而知 Gelato 有幾真材實料。

趁 Gelato 溶之前大啖咬落去，真係好有食榴槤肉嘅感覺！上層貓山王果肉有一絲絲嘅口感，下層 Gelato 就比較滑而且無冰粒，最重要嘅係榴槤香味一樣濃郁。食完一條最後口腔仲有少少貓山王榴槤獨有嘅回甘。

同場加映杯裝嘅貓山王果肉，細細杯直接當甜品食得，拎嚟整各種冷熱甜品亦得，得咗。一樣係真·貓山王榴槤果肉，伴 D24 榴槤果肉、奶、糖同棕櫚油，保存喺 -18℃ 或以下嘅地方就可以 Keep 得比較耐。不過急凍榴槤蓉帶少少冰粒，想整榴槤 Pizza 或者其他熱食嘅時候要注意喇。

榴槤 BB

地址：荃灣青山公路 264-298 南豐中心 7 樓 737 號舖

查詢：3708 8732

閱讀全文：
屏幕截圖
原文出處

更多
~ 媒體報導 ~