關於我們 | 如何下單 | 超級會員 | 榴槤百科 | 媒體報導 | 真實評語

媒體報導:集合大馬三地榴槤王 任食品鑑Party直擊
OpenRice / 2018-07-21


鍾意食榴槤嘅為食友,係咪都想有機會任食榴槤?開飯仔就帶大家直擊呢個榴槤任食品鑑Party,可以120分鐘任食唔同品種嘅榴槤!今次仲集合咗馬來西亞南、中、北部三大榴槤王,想知有咩特別就睇下面逐一介紹啦。

榴槤BB再次同馬來西亞聯邦農業促銷局合作舉辦任食品鑑Party,不過注意返活動係不定期舉辦,下一場暫定8月中。因為老闆KK要確保有足夠品種同數量嘅榴槤當造先會搞,有興趣嘅話不妨留意佢地Facebook。

120分鐘嘅任食品鑑Party分兩個部分,頭30分鐘係品鑑部分,每人都會有一份品鑑盤,上面有唔同品種嘅榴槤各一粒。有專人介紹馬來西亞榴槤嘅特色,逐一講解唔同品種嘅資料,同一啲有關榴槤嘅知識。之後90分鐘就係榴槤迷期待嘅任食環節!

呢次嘅品鑒盤有五款榴槤,試嘅時候記得注意兩點:一,由左開始食到右,因為呢個係按榴槤香味排嘅順序,由比較淡味嘅D13金包開始食到最後最濃郁嘅D197老樹貓山王,咁就唔會互相蓋過味道。二,枱面會有一支水免費提供,食完一件可以飲啖水清洗一下口腔,咁先試到榴槤真味。

D13金包

因為果肉顏色特別金黃因而取名金包,口感特別Creamy幼滑,味道會偏甜少少,所以係唔少榴槤迷嘅心水之選。之後嘅任食環節就有唔少人指定要Encore呢一款!

D24山頂XO

顧名思義,山頂XO嚟自果園山頂栽種嘅榴槤樹。而XO係指食落有種陣類似XO酒嘅酒香!果肉柔軟而酒香餘韻悠長。

D198金鳳

嚟自馬來西亞南部嘅金鳳喺當地相當受歡迎,香港坊間就較為少見。顏色較淺,果核較細而果肉偏乾,食落特別有厚實感都幾討好。味道甘甜得嚟帶少少酒香。

D200黑刺

而黑刺就係馬來西亞北部嘅榴槤王,果肉纖維比較多,無咁Creamy但味道更甜,甘味唔太明顯,係比較大眾化嘅口味。

D197老樹貓山王

馬來西亞中部嘅代表,老樹意指樹齡超過30年,難怪榴槤香味同回甘都係五個品種當中最高嘅。果核較細,果肉軟綿有入口即溶感。入口味道以回甘果香為主,之後會有少少酒香,最後口腔會有一絲絲甜味餘韻,味道層次豐富。

揀啱心水品種之後,就可以準備進入任食環節。有職員放到枱上,行都唔洗行呀。呢120分鐘大家可以食到幾多?老闆KK表示按之前經驗,女士平均食到20粒,男士比較多可以去到30至40粒。最高紀錄之前係香港有位男士食咗94粒,但最近俾新加坡另一位男士打破,兩小時裡面食咗200粒!

呢次有啲可惜嘅係D198金鳳同D200黑刺不設任食,其餘三個品種每四位會各有一碟,食完可以按需要隨意添加。三款品質平均嚟講都唔錯,而且添加數量都足夠滿足呢場嘅所有客人。

心思思想嚟食又等唔切放題?平時可以上官方網站預訂榴槤品鑒盤!會有D13金包、D24山頂 XO、D197老樹貓山王,加兩款唔同品種嘅馬來西亞榴槤,堂食或者外賣都得。仲未夠喉嘅話,可以去一角嘅榴槤BB Cafe,飲杯用貓山王或者金包榴槤打嘅奶昔呀。

榴槤BB
觀塘敬業街65-67號敬運工業大廈2樓B號舖


閱讀全文:
屏幕截圖
原文出處

更多
~ 媒體報導 ~


© 2015-2024
DurianBB.com / 榴槤BB

粤ICP备19146540号